LAOAG CTIY – Nagballigi dagiti otoridad a nangarestar iti maysa a senior citizen a ni Ernesto Rambac, agtawen ti 74, taga Barangay Paayas iti ili ti Burgos ngem agdama nga agnanaed iti Barangay 12, San Cayetano iti ili ti San Nicolas.
Daytoy ti inbatad ni Police Major Sheryl Guzman, ti pannakangiwat iti Ilocos Norte Police Provincial Office.
Kuna na a naarestar ti nasao a senior citizen iti Barangay Paayas iti ili ti Burgos babaen ti warrant of arrest nga inparuk-at ni Judge a. Cristina Porcia-Libera iti Municipal Trial Court iti Sudipen, La Union gapu iti kaso na double serious physical injuries with damage to property thru reckless imprudence.
Inbatad ni Guzman a naireklamo ti akusado iti probinsya ti La Union kalpasan a nairaman iti napasamak a disgrasya.
Mainaig iti daytoy, nairekomendar ti 50 ribo a pisos a piyansa ti akusado para iti temporaryo a pannakawaya-waya na.
Iti agdama, nagtalinaed ti akusado iti Philippine National Police iti ili ti Burgos ken manamnama a maidatag daytoy iti korte a naggapwan ti warrant of arrest.
