LAOAG CITY – Natiliw ti maysa a senior citizen gapo iti a panaglabsing na iti Republic Act 8353 wenno panagrames ken Republic Act 7610 wenno child abuse ditoy ciudad ti Laoag.
Nabigbig ti akusado a ni Vicente Tumaneng y Faylogna, agtawen ti 62, naasawaan ken residente iti Barangay 33-B, Lapaz ditoy ciudad.
Naamoan a ti kaso ni Tumaneng a panagrames ket awan ti nairekomendar a pyansa idinto a ti child abuse a kaso na addan ti pyansa a 120 a ribo a pisos.
Ti warrant of arrest a napetsaan ti Mayo 6, 2019 ket inparuk-at ni Hon. Judge Nida B. Alejandro iti RTC Branch 11 ditoy ciudad ti Laoag.
Mainaig iti daytoy, inpetteng ni Tumaneng a saan na nga ammo a napilaan ti kaso a panagrames.
Basar ti impormasyon, ti maipagarop a biktima ti panagrames ket kaanakan ti agdama nga asawa ti suspek.
Inlawlawag na a dinalusan wenno binugwan na laeng ti agtawen ti tallo nga ubing kalpasan a nagrugit ngem ditoy metten a naakusaran nupay kunana a saan na a sinagid wenno inan-ano ti maipagarop a biktima.
Manamnama nga ita nga aldaw ket maipresentar ti akusado iti korte a naggapwan ti warrant of arrest.
