LAOAG CITY – Inpakaammo ni Brgy. Chairman Marlon Batoon iti Brgy. Suba iti ili ti Paoay a naipan iti lockdown ti sibubukel a Sitio Surngot iti nasao a barangay.
Inbatad na a daytoy ket kalpasan nga adda ti nadeterminar a nagpositibo iti delta variant ken kas nailanad iti inparuk-at nga Executive Order ni Mayor Romulo Acdal.
Immuna iti daytoy, inlawlawag ni Batoon a nagturong iti ospital idi Hulyo 17 ti pasyente gapu iti panggurigor daytoy.
Kuna na a dita a dimmalan iti swab test ken kalpasan ti agarup dua nga aldaw ket rimuar ti resulta ken positibo daytoy.
Inbatad na a sipud naamoan a nagpositibo ti pasyente ket dagus a naghome-isolation agingga idi Agosto 9 kadua na ti asawa na a positibo met laeng iti virus.
Kabayatanna, inpakaamo ni Batoon a posible nga adda ti maiyuswat a contact tracing agingga iti third generation contact ti pasyente.
Innayun na a saan met pay a masinunuo ti panagngudo ti lockdown iti Sitio Surngot.
Naamoan nga iti agdama ket tallo ti aktibo a kaso ti coivid-19 ity Brgy. Suba pakairamanan ti positibo iti delta variant.
