LAOAG CTY – Nasurok 50 a ribo a pisos ti naitaay manipud iti maysa a Korean national bayat nga adda iti fast food restaurant iti Robinson’s Mall iti ili ti San Nicolas.
Daytoy ti kinumpirmaran ni Pol. Capt. Ashley Cacayorin, ti Deputy Chief of Police ti Philippine National Police iti nasao nga ili.
Segun ken ni Cacayorin, ti biktima ket agtawen iti 57manipod iti pagilyan a Korea ngem agdama nga agnanaed iti Brgy. Nagsanga iti ili ti Pasuquin.
Kunana a basar iti imbestigasyon da, nagturong ti biktima ken ti asawa na iti maysa a fast food restaurant iti nasao a Mall idi adda dagiti grupo dagiti babai nga immasideg ken maipagarup nga ip-ipiten da ti biktima kageddan ti panangkaot da iti wallet na nga aglaon iti nasurok 50,000 pesos, identification cards, ATM cards, ken driver’s license.
Inlawlawag na nga idi kitaen ti biktima ti wallet na iti bag na iti pasado ala-una iti malem iti Mayo 5 ket awanen daytoy.
Inbatad na nga agpapan ita ket saan da pay a nabigbig no siasinno ti suspek gapo ta saan a klaro ti CCTV footage ken defective iti kaadoan a CCTV iti Mall rason a marigatan da a mabigbig ti dagiti suspek.
Mainaig iti daytoy, inpakaamo ni Cacayorin a nabayagen nga ikidkiddaw da iti Mall a sukatan da dagiti CCTV tapno masigurado ti seguridad dagiti tattao nga agturong iti daytoy a lugar nangnangruna ket adda iti Memorandum of Agreement a apirmaan ti nagbaetan ti PNP-San Nicolas ken ti Mall.
Kabayatanna, inbatad dagiti papagayam ti biktima nga innem a babbai ti nagtitinnulong tapno maala ti kwarta iti bag ti biktima.
