Nairekord iti maysa a bilang ti taraken a natay gapu iti heat stroke.
Daytoy ti inbatad ni Dr. Samantha Licudine, mangidadaulo ti city veterinary office ditoy siudad ti Laoag.
Naamoan a ti taraken ket maysa nga aso a shitzu nga agtalinaed ditoy siudad.
Inlawlawagna a dagitoy a babassit a dingwen kas ti tao ket ad-adda a nairisgo iti heat stroke gapu addaan dagitoy ti basbassit a pagangesan.
Segun ken ni Licudine, dagiti kangrunaan a senyales ti heat stroke ket alisto a panaganges ti aso, saan a makatalna, nalabes a panagkatay ken panagkapsot.
Kabayatanna, inbatadna a pakaseknan ti livestock ket awan ti aniaman a nairekord iti city veterinary a pimmusay iti agdama.
