LAOAG CITY – Maysa a tornado ti dimmuprak iti Northern California a nangitunda ti pannakadadael dagiti pasdek ken naruay a tattao ti nasugatan.
Segun iti Scotts Valley Police Department, mannarimaan ti monitoring da kadagiti adda kadagiti balay pagagasan sipud ta adu dagiti nakapasar ti nakana a sugat.
Ipangpangruna met ti emergency medical teams dagiti kasapulan dagiti ubbing a naapektaran.
Segun ken ni Bombo International News Correspondent Isidro Madamba Jr. iti California USA a manmano laeng a mapaspasamak ti tornado iti California.
Kunana a 50 kilometers laeng ti kaadayu na ti tornado iti San Francisco isu a narikna da ti nagbalin nga epekto ti nasao a didigra.
Innayonna pay nga adu a kotse ti naiyangin ken natrap iti igid ti kalsada, idinto a rinibribu ti napukawan ti suplay ti kuryente.
Pinasingkedan pay ni Madamba nga awan met dagiti Pilipino a nasugatan wenno nairisgo ti biag na.
Kabayatanna, inpakaammu met ti weather service iti nasao a pagilian nga adda pakabuklan a 11 a tornado iti uneg yi makatawen ti posible a mapasamak iti California.
