LAOAG CITY – Nasugatan ti saka ti maysa a lalaki kalpasan a naitapwak iti kataltalonan iti paset ti Barangay Aruwaay iti ili ti Piddig ti nagluganan da aToyota Hilux.
Daytoy ti kinumpirmaran ni Police Capt. Rudy James Jacalne, ti chief of police iti ili ti Piddig.
Segun ken ni Jacalne, sangapamilya ti nakalugan iti nasao a Toyota Hilux idi napasamak ti insidente no sadinno a pakairaman ditoy dagiti agasawa, dua nga annak da ken ti ama ti lalaki, agpapada a residente dagitoy iti ili ti Solsona.
Inbatad ni Jacalne a ti nasugatan ket ti asawa a lalaki ken dagitoy ket aggapo da iti ospital ditoy ciudad ti Laoag gapu ta napan da nagpa-checkup.
Inlawlawag ni Jacalne a basar iti imbestigasyon da, bayat nga adda da iti agkurba a paset ti kalsada iti nadakamat a lugar ket na-overshoot ti lugan gapu ta saan a kabisado ti driver ti dalan a nangitunda ti pannakaitapwak na iti kataltalunan.
Innayon ni Jacalne a nataray ti nasao a lugan idi napasamak ti insidente.
