LAOAG CITY – Nauram ti maysa a Transit Mixer iti maysa a Construction Firm iti paset ti Brgy. Bengcag ditoy Siudad Siudad ti Laoag.
Segun ken ni Jesus Arimboyutan, akinkukua ti nasao a Construction Firm, kabayatan iti panang-maintenance ti nasao a lugan ket kellaat lattan nga adda pimmutok gapu iti napasamak a short circuit.
Gapu iti daytoy, kinunana a dagus a pinaguyodda ti maur-uram a lugan babaen iti maysa a pay loader tapno maiyado ken saan a mairamraman ti kaabayna a lugan nga agpada met laeng a Transit Mixer.
Inbatadna a napigsa angin idi napasamak ti uram rason nga alisto a nagramram ken dimmakkel ti apoy.
Inlawlawagna nga awan met ti nasugatan iti napasamak a pannakauram ti lugan.
Mainaig iti daytoy, inpakaammo ni Fire Officer III John Patrick Angel, Chief Investigator ti Bureau of Fire Protection ditoy Siudad ti Laoag nga agdagup ti sangagasut a ribu a pisos ti balor iti nadadael gapu iti uram.
