LAOAG CITY – Nagballigi dagiti otoridad a nangtiliw ti maysa a tricycle driver iti naiyuswat a drug buy-bust operation iti paset ti Barangay Nagrebcan, San Nicolas, Ilocos Norte.
Nabigbig daytoy a ni Moises Valdez y Piedad, agtawen iti 40, addaan ti live-in partner, tricycle driver ken residente iti Barangay 5, San Silvestre iti nasao nga ili.
Natiliw ni Valdez kalpasan a maipagarop a naglako iti maysa a bassit a sachet a naglaon ti maipagarop a shabu iti maysa a pulis a nagpammarang a poseur buyer.
Inbatad ni Police Lt. Eddie Valdez, ti deputy chief of police iti PNP ili ili a San Nicolas nga iti panangkakap da ken ni Valdez ket nakaala pay dagiti pulis iti posisyon na iti maysa a sachet a naglaon ti maipagarop a shabu, ti sangaribo a pisos a nausar iti operasyon, lighter, 70 a pisos a personal a kwarta na.
Segun kenkuana, ti maipagarop a shabu ket nabungon ti supot ti chewing gum ken daytoy ket naipalapit iti wallet ti akusado karaman ti buy-bust money.
Inpakaammo na nga iti agdama ket nagtalinaed iti kustodyar ti PNP-San Nicolas ni Valdez bayat a maisagsaganan ti kaso a maipila kontra kenkuana.
Manaig iti daytoy, inbatad ni Valdez a saan a drug surrenderer ti suspek ngem minonmonitor da gapu ta adda ti nangireport kadakuada mainaig iti illegal nga aktibidad na.
Kabayatanna, inbatad ni Barangay Kagawad Jojo Bagay iti nasao a barangay nga awan ti madi a rekord iti barangay da Valdez.
Segun kenni Bagay, sipud nagbalin isuna kas opisyal ti barangay ket awan pay ti nadamag na pakirir-riryan ti ni Valdez malaksid laeng iti asawa na.
Inlawlawag ni Bagay a gapo iti kanayun a panagin-inom ni Valdez ti makitkita na laeng a rason ti pagriryan da iti asawa na.
Basar kenni Bagay, idi naminsan a nagriri dagiti agasawa ket maipagarop nga adda ti naibaga ti babai nga agus-usar ni Valdez ti iligal a droga.
