LAOAG CITY – Naitaray iti nagsisina nga ospital dagiti biktima kalpasan a nagdinnungpar ti maysa a Toyota Corolla ti maysa a traysikel iti paset ti Josefa Llanes Escoda Highway iti Brgy. 24, Sta. Monica, San Nicolas, Ilocos Norte.
Nabigbig dagitoy a da Mark Lester Villanueva, 23, residente iti Brgy. 5, San Ramon iti ili a Vintar, driver ti tricycle ken dagiti agina a pasahero na a da Marivic Besas y Andrada, 35 ken ti anak na a ni Michael Angelo Besas, agtawen ti 6, residente dagitoy iti Brgy 24, Sta. Monica iti ili a San Nicolas.
Iti inisyal nga imbestigasyon, napasamak ti insidente kabayatan ti panagpadpadaya a direksyon ti traysikel idinto nga agpapalaud met ti Toyota nga inturong ni Demetrio Savellano Jr y Paz, 48, taga Brgy. Salomague, Cabugao, Ilocos Sur.
Naipan ni Villanueva iti Governor Roque Ablan Senior Memorial Hospital (GRASMH), idinto a naitaray iti Black Nazarene Hospital ti ina a Besas ken ti anak na ket iti Laoag City Genaral Hospital para ti pannakaagas dagiti sugat iti nagduduma a paset ti bagida, idinto a saan a naan-ano ni Savellano.
Agtultuloy ti imbestigasyon dagiti otoridad mainaig iti napasamak nga insidente.
