LAOAG CITY – Iyur-uray ti Philippine National Police ti resulta ti panangiberipikar da iti Land Transportation Office ti nadiskubre a naabandonar a tricycle iti bakante a lote iti paset ti Barangay 30, Sta. Maria ditoy ciudad ti Laoag.
Daytoy ti inbatad ni Police Capt. Kester Arellano, ti Deputy Chief of Police ditoy ciudad ti Laoag.
Inlawlawag ni Arellano a basar iti dcertificate of registration a nakita iti uneg ti tricycle ket nakainagan daytoy iti residente iti Barangay Calusa iti ili ti Piddig.
Nupay kasta, iti panangiberipikar dagiti otoridad iti maseknan ket inpakaammo na a nabayagen nga inlako da ti tricycle.
Immuna iti daytoy, nadiskubre ti agnagan ti Sophia Torralba, agtawen ti 38 ti nasao a tricycle iti bakante a lote iti Barangay Sta. Maria ditoy ciudad isut gapuna nga inpakaammo na a dagus iti kapitan ti barangay kalpasan na ket inreport da daytoyen iti Philippine National Police.
