LAOAG CITY – Naitaray iti Gov. Roque Ablan Senior Memorial Hospital dagiti dua a biktima ti napasamak a desgrasya iti bypass road iti Barangay 57, Pila ditoy ciudad ti Laoag.
Dagiti biktima ket maysa a tricycle driver, agtawen ti 40, naasawaan, ken residente iti Barangay 55, Salet ken maysa a menor de edad nga agtawen ti 15, taga Barangay Guerrero iti ili ti Dingras.
Nakadinnungpar ti tricycle ti Hyundai Starex nga inturong ti agtawen ti 35, naasawaan, mannalon ken residente iti Barangay 38, Sangil iti ili ti Bacarra.
Iti imbestigasyon dagiti otoridad, bayat nga agpalaud a direksyon ti tricycle a naggapo iti daya a direksyon partikular iti bypass road ket dumalyasat met nga isu ti nangitunda ti desgrasya.
Gapo iti daytoy, naitapwak ti tricycle iti taltalon ken nagsagaba ti sugat ti driver kangrunaan ti saka na idinto a ti menor de edad ket nasugatan met ti saka, ima ken ti likod ti akin-kannawaan a lapayag na.
Basar met iti impormasyon, ti nasao a driver ket nakarwaren iti ospital idinto a ti balasitang ket manarimaan pay laeng nga agpapalaing.
