LAOAG CITY – Nagbaliktad ti maysa a White Isuzu Forward kalpasan a napukawan iti kontrol ti manibela iti paset ti zigzag road iti Brgy. Baruyen iti ili ti Bangui.
Segun ken ni Police Captain Marlon Lorenzo, ti Hepe iti Philippine National Police iti nasao nga ili, nabigbig ti driver ti White Isuzu Forward a ni Edwin Morales y Vidad, agtawen ti 54, naasawaan, awanan ti driver’s license ken residente ti Brgy. Nimumbot, Mapandan, Pangasinan.
Inbatadna a basar iti insayangkatda nga imbestigasion, kabayatan a dumaldalyasat ti White Isuzu Forward nga agpa-amianan a nagkarga kadagiti sinako nga asin ken kinarton a bote ti buggoong ket kellaat a saan a makakambio ti driver ti lugan a rason a napukawan daytoy iti kontrol ti manibela.
Gapu iti daytoy, inpalgakna a nagsagaba ti sugat iti nagduduma a paset ti bagi ti driver ken dagiti uppat a kakaduana a naitaray iti Bangui District Hospital ngem naiyakar ti maysa kadakuada iti Mariano Marcos Memorial Hospital and Medical Center iti siudad ti Batac.
Kunana nga adda ti innem nga indibidual ti nakalugan iti nasao a truck no sadino agturongda koma iti paset ti Cagayan tapno agi-deliver dagitoy kadagiti kargada nga asin ken buggoong.
Kabayatanna, bayat a maisursurat daytoy a damag ket saan pay a nabangon iti nasao a truck ken manamnama a sumangpet ita nga aldaw ti akinkukua iti truck manipod pay idiay Pangasinan.
