LAOAG CITY – Addan iti natalged a kasasaad ti driver ti motorsiklo a nasapgud ti truck a naidungpar iti maysa a pagtaengan iti Rizal St., bisinidad ti Barangay 23 ditoy ciudad ti Laoag.
Daytoy ti inbatad ni Police Lt. Col. Rafael LEro, ti chief of police ti PNP-Laoag.
Iti imbestigasyon dagiti otoridad, agturong iti amyanan a direksyon ti driver ti nakamotorsiklo idinto a ti truck ket aggapo iti Sarrat road ken mapan iti Barangay Barit ditoy ciudad.
Segun kenni Lero, kellaat a naawanan ti preno ti truck a rason a naidungpar daytoy iti maysa a pagtaengan ngem saan met a naan-ano ti driver.
Innayon na nga adda metten ti inisyal a saritaan ti agtagikua ti truck ken motorsiklo ken ti agtagikua iti pagtaengan.
