LAOAG CITY – Nagbaliktad ti maysa a Van kalpasan a naidungpar iti puon ti niyog iti dalan a sakupen ti Brgy. 22 iti ili ti San Nicolas.
Binigbig ni Pol Capt. Ashley Cacayorin iti Deputy chief of police iti pnp san nicolas ti driver a ni Michael Coloma Agluba, agtawen ti 36, awanan ti asawa ken residente iti Brgy. 15 San jose iti nasao nga ili.
Kuna ni Cacayorin a manarimaan nga agpalaud ti van idi kelaat a naiturog ti driver.
Gapo iti daytoy, naidungpar iti puon ti niyog ken isu met ti nangitunda iti panagbaliktad ti behikulo.
Nagsagaba ti gasgas ti nagduduma a paset ti bagi ti biktima ken dagus a naitaray iti Governor Rowue Ablan Sr. Memorial Hospital ditoy siudad ti Laoag ken adda metten iti nasayaat a kondisyon.
Kabayatanna, inpakaammo ni Cacayorin nga awan met ti maipila a pannusa iti driver gapo ta self vehicular accident daytoy.
Inpakaamo pay ti opisyal nga inyawiden dagiti kameng ti pamilya iti van nga inusar ti driver.
