LAOAG CITY – Nagpalagip manen ni Police Capt. Randy Damo, ti chief of police iti ili ti San Nicolas kadagiti motorista a saan nga agmaneho a nabartek.
Inaramid daytoy ni Damo kalpasan ti napasamak a disgrasya iti Barangay 24, Nagrebcan iti nadakamat nga ili no sadinno a natnag ti maysa a van nga inturong ni Harold Doctor, agtawen ti 31, taga Barangay 17 iti ili ti Sarrat.
Segun ken ni Damo, napukawan ti control iti manibela ti driver iti agkurba a paset ti kalsada a nangitunda ti pannakadungpar na iti poste ti kuryente ken nagderderetso iti creek.
Awan met ti sinagaba a nakana a sugat dagiti nakalugan iti van, pakairamanan ti driver a ni Doctor.
Kinumpirmaran ni Police Capt. Damo a dagiti nakalugan iti nasao a van ket nakainom da ti nasanger ken aggapo da iti paggiinuman.
Inyunay-unay ni Damo a saanen nga agmaneho no nakainom ti nasanger tapno maliklikan ti pannakadisgrasya, a dagiti dadduma ket mangitunda pay iti ipupusay da.
