LAOAG CITY – Napateg nga umuna a mainspeksyon dagiti behikulo sakbay nga agbiyahe tapno maliklikan ti aniaman nga aksidente.
Daytoy ti inpalagip ni Fire Senior Inspector Ronald Castillo, ti fire marshall ditoy siudad ti Laoag kalpasan a nauram ti maysa a van bayat a dumaldalyasat iti kalsada a masakupan iti Brgy. 13 ditoy siudad.
Kuna ni Castillo a ti makitkita a namunganayan ti uram iti nasao a behikulo ket ti electrical short circuit kadagiti waya daytoy.
Gapu iti daytoy, inbatad na nga adda ti panaggalyaab ti apoy agingga nga in-inot a nauram ti sibubukel a van.
Naamoan ti Bombo Radyo manipod kadagiti pannakabagi ti BFP nga agpapaamianan a direksyon ti van idi ta kellaat a gimmilyaab ti apoy iti makina daytoy.
Dagus a nakasardeng ti van ken nakaruar pay laeng dagiti tallo a nakalugan sakbay a naminpinsan a nauram rason nga awan ti siasinoman a nadangran.
Malaksid iti van ket nadanon ti apoy ti sumagmamano a waya ken poste ti kuryente.
Kabayatanna, nasebseban ti uram babaen kadagiti kameng ti BFP-Bacarra gapu iti pannakaipan iti lockdown ti BFP-Laoag.
