LAOAG CITY– Nagsagaba ti nagduduma a sugat iti bagi na ti maysa a babai kalpasan a nabagko-bagkong babaen iti dati a nobyo na bayat nga adda iti ospital.
Binigbig ti Police Chief Inspector Rodelio Santos, chief of police ti PNP-Batac ti biktima a ni kathlyn Mae Rapis, agtawen ti 20 awanan ti asawa ken residente iti Barangay Darat iti ili ti Pinili idinto a ti suspek ket ni Aldrin Jay Pajinag, dati a nobyo ti biktima ken residente iti Barangay Lacuben iti ili ti Badoc.
Iti inisyal nga imbestigasyon, bayat nga adda iti emergency room iti Mariano Marcos Memorial Hospital and Medical Center idiay ciudad ti Batac ken simrek ti suspek nga adda ti ikot na a kutsilyo.
Inbatad na nga apaman a nakadanon ti suspek iti mismo nga abay ti biktima ket binagko-bagkong na daytoy ken kalpasan na ket dagus a naglinas ti suspek a naglugan ti motorsiklo nga agmaris ti asul.
Mainaig iti daytoy, adda ti panangkwestyunar ni Santos kadagiti guard no apay a nakastrek ti suspek nupay adda ti imet na a kutsilyo.
Agtultuloy met ti manhunt operation nga iyus-uswat ti PNP-Batac ken PNP-Badoc tapno matiliw ti nasao a suspek.
Immuna iti daytoy, naiconfine ti biktima iti nasao nga ospital kalpasan a kinabkabil met laeng ti suspek.
