LAOAG CITY – Nagsagaba ti sugat ti akin-kannigid a gurong ken ulo ti maysa a lola kalpasan a nadungpar ti maysa a nakamotorsiklo ti paset ti Barangay 5, San Ramon idiay Vintar, Ilocos Norte.
Nabigbig ti biktima a ni Lydia Villanueva, agtawen ti 66, naasawaan ken residente ti nasao a lugar.
Segun iti imbestigasyon, bayat ti panagdaldalyasat ti motorsiklo nga inturong ni Jayson Cadang, agtawen ti 31, baro, maysa a mannalon ken residente iti Barangay Salsalamagui iti ili a Vintar, aksidente a nadungpar na ti baket a magmagna ti pedestrian lane.
Naitaray ti biktima iti Governor Roque Ablan Senior Memorial Hospital ditoy ciudad ti Laoag para ti naan-anay a pannakataming na.
