LAOAG CITY – Dead on the spot ti maysa nga opisyal ti barangay kalpasan a napalto-paltogan iti maysa videoke bar iti Brgy. Davila iti ili a Pasuquin.
Nabigbig ti biktima a ni Barangay Kagawad Vincent Manzano y Reyes, agtawen ti 39, naasawaan, maysa a mannalon ken residente ti Brgy. Dilavo iti nasao nga ili.
Segun ti imbestigasyon dagiti kameng ti PNP Pasuquin, kadua ni Manzano nga agin-inom iti nasao a bar iti agnagan ti Ronald Edurize, agtawen ti 33, naasawaan ken maysa a mannalon ken residente iti Brgy 8 Sulongan iti nasao nga ili.
Kuna ti PNP nga immasideg ti saan a nabigbig a lalaki kadagiti dua ken kelaat a pinaltogan na ti namitlo a daras ni Manzano idinto a dagus a timmalaw ti suspek.
Nagsagaba ti biktima ti dua a tama ti bala ti kalibre 45 a paltog iti ulo na.
Narekobre dagiti kameng ti PNP ti tallo a deformed slug ken tallo a basyo ti kalibre 45 a paltog iti nakapasamakan ti videoke bar iti brgy Davila iti nasao nga ili.
Mapapati a nakaawat ti death threat ti biktima sakbay a napasamak ti pammaltog.
Agtultuloy ti imbestigasyon dagiti kameng ti PNP Pasuquin iti daytoy a pammaltog.
