LAOAG CITY – Ballaigi ti naisayangkat a search warrant operation iti pagnanaedan ti agnagan ti Christian Juan, agtawen ti 28, awanan asawa ken residente iti Bgy. 62-A navotas ditoy ciudad ti Laoag.
Dagiti kameng ti PNP Laoag nga indauloan ni P/C/Insp. Norman Pentang ti nangisayangkat ti operasyon kalpasan a nakaawat da ti impormasyon a ni Juan ket maipagarup nga adda ti pannakainaig na iti operasyon ti maipawil a droga.
Kas resulta ti operasyon, nakarekubre dagiti search team ti saggaysa a bala ti para iti M-16, Caliber 45, Caliber 22 ken maysa a kapsula ti bala ti kalibre 22.
Malaksid kadagiti nasao a bala, nakarekubre pay dagiti pulis ti 5 a sachet a naglaon ti maatap a shabu ken 4 a sachet a naglaon ti maatap a napagango a bulong ti marijuana nga adda pay bukel ken ungkay na.
Inmatangan dagiti kameng ti media ken opisyales ti Bgy. ti nasao a search.
Maisagsaganan a maipila ti reklamo a mpanagikot kadagiti bala nga awanan ti lisensiya na ken panagikot ti maipawil a droga.
Kabayatan na, inbaga ni Juan a saan na a maako a kukua na dagiti narekubre iti mismo a paggigiyan na.
Kuna na a saan na pay napadas a nageggem ti paltog ken saan na a kukua dagiti naala a maipawil a droga.
Patien na a naimula dagitoy babaen kadagiti nagsukisok iti pagtaengan da gapu kasanguanan ti search ket adda iti simrek a patien da a pulis.
Kalikagum na a maipadalan ti “finger print” dagiti amin a marekubre tapno madeterminar no siasinno dagiti naudi a nakaiggem dagitoy.
Innayon ni Juan a nakasagana daytoy a dumalan ti drug test tapno mapaneknekan a saan daytoy nga agus-usar ti maipawil a droga.
Mainaig iti daytoy, inbatad ni P/C/Insp. Norman Pentang a karbengan ni Juan ti mangdepensa ti bagi na ket itinton korte ti panangipaneknekan na iti alegasyon na kontra kadakuada a nagimula da iti ebidensiya.
Nakigtot met ni Bgy. Chairman Jerry Corpuz ti Bgy. 62-A Navotas Laoag City iti naiwayat a search operation ken ni Christian Juan.
Segun ken ni Corpuz, awan pay ti madi a nakaidamdamagan, saan a nawarang a tao, ken saan a drug personality ni Juan.
