LAOAG CITY – Dead on arrival iti ospital iti ili ti Marcos ti maysa a baro kalpasan a nagbekel iti Bgy. Caestebanan, iti ili ti Banna.
Nabigbig daytoy a ni Mac Joemarc Galarce, agtawen iti 21, awanan asawa, maysa a construction worker ken residente iti nasao met la a barangay.
Segun ken ni P/Sr./Insp. Artemio Clemente, Chief of Police iti ili ti Banna, maipagarup nagpakamatay ti biktima gapu ta saan a kayat ti pamilya ti nobya na.
Kuna na nga iti panagimbestigar da ket nakabasa da kadagiti sumagmamano a txt messages iti cellphone ti biktima seknan iti panagriri da iti nobya na.
Daytoy ket kalpasan a maipagarup a kontraen ti pamilya ti babai ti relasyon da ken kayat da nga agsinadan.
Gapu iti daytoy, nagpangta ti biktima nga agpakamatay laengen no isina ti nobya na ket dita a nakitan a nakabitin iti uneg ti balay da.
