LAOAG CITY – Tiniliw dagiti otoridad ti maysa a lalaki kalpasan ti maipagarop panaghold-up na iti maysa a dental clinic iti sentro iti ciudad ti Laoag.
Nabigbig ti suspek a ni Raymund Camba Caasi, agtawen ti 22, baro, taga Quezon City ngem agdama nga agnanaed iti Barangay 1 iti ili ti San Nicolas.
Naamoan a nagturong ti suspek iti nasao a dental clinic ken nagpammarang nga agpagabot ti ngipen.
Kabayatan ti panagsagsagana da Melrose Banquil, maysa a dentist ken ti nurse a ni Jelome Banquil ket kellaat a ginuyud ti suspek ni Melrose ken intutuk na ti iggem na a kutsilyo iti tengnged na kagiddan ti panangideklar na ti holdup.
Nupay kasta, bayat ti panagukkon ti suspek kadagiti nagduduma a banag iti uneg ti nasao a dental clinic ket dimteng dagiti kameng ti PNP Traffic Division isut gapu na a saanen a nakalibas pay ni Caasi.
Iti agdama, nagtalinaed ti suspek iti kustodyar ti PNP-Laoag ken maisagsaganan ti kaso a maipila kontra kenkuana.
