LAOAG CITY – Tiniliw dagiti otoridad ti maysa a kameng ti CAFGU kalpasan nga inlako na ti anak na a 22-day old na pay laeng idiay Solsona, Ilocos Norte.
Nabigbig daytoy a ni Francisco Palacio, taga Barangay Sto. Niño iti ili ti Nueva Era ngem agnanaed idiay Barangay Manalpac iti ili a Solsona.
Naamoan nga inlako ni Palacio ti anak na ti agnagan ti Catherine Garcia ken maipagarop a taga Candon City ti balor a 5 ribo a pisos.
Inbatad ni Police Senior Inspector Heidy Angelito, mangidadaulo iti Womens Divion iti Ilocos Norte Police Provincial Office, inlawlawag ti ina ti maladaga a ni Lanilyn Bitog, nagturong ni Garcia ti lugar da ken bayat nga agmermeryenda da ket nakita na nga adda ti inyawat ti babai a kwarta ti live-in partner na a CAFGU.
Kuna ni Bitog a kalpasan a nagmeryenda da ket inbilin ni Palacio a sumurot da ti anak na ken ni Garcia nga umay ditoy ciudad ti Laoag ken naglugan dagitoy ti van nga addaan ti rota a Laoag-Claveria.
Innayo na nga idi makadanun da ditoy ciudad ket nagpangta ni Garcia a bekkelen na no saanna nga iteg ti anak na a maladaga.
Ditoy a naamoan na nga inlako ti live-in partner na ti maladaga isut gapu na a nagpatulong kadagiti otoridad.
Iti agdama, nagtalinaed ti kustodyar ti PNP-Solsona ti CAFGU ken maisagsaganan ti kaso a maipila kenkuana.
Kabayatanna, immapela ti tulong ti PNP ti publiko a no adda ti makita da a maladaga a mailaklako wenno baro laeng ti lugar da ket ipakaammo da a dagus kadakuada amangan no daytoy ti nailako a maladaga.
