LAOAG CITY – Balligi ti naiyuswat a drug buy operation nga inyuswat ti PNP-Badoc a nakatiliwan ti maysa a lalaki idiay Brgy. Sta Cruz Sur iti nasao nga ili.
Binigbig ni Police Senior Inspector Joseph Tayaban, chief of police ti PNP-Badoc ti subject a ni Janson Tangonan aylas Daniel, agtawen ti 26, awanan ti asawa, dati a Barangay tanod, drug surrenderer ken residente iti nasao a lugar.
Nakumpiskar dagiti otoridad ti dua a sachet a naglaon ti maipagarop a shabu no sadinno a maysa ti nagatang ti police puseur buyer ken maysa iti ikot ti suspek, buy bust money, nasurok lima a ribo a kwarta ken motorsiklo na.
Inbatad na a no bigat kuma a naisayangkat ti operasyon ket mabalin nga ad-ado kuma ti nakumpiskar da gapo ta mabalinen a nailako nan dagiti dadduma gapo ta ado ti kwarta ni Tangonan.
Segun kenni Tayaban, agtultuloy latta ti panagilako ni Tangonan ti maatap a shabu a maigarop nga aggapo idiay ili ti Sinait, Ilocos Sur isut gapo na a nangiyuswat da ti operasyon.
Iti agdama ket maisagsaganan ti kaso a maipila kontra iti nasao a suspek.
Nagpanawagan met daytoy iti ama ti suspek a maipagarop nga adda ti pakainaigan na iti iligal a droga nga agsardengen tapno saan a maiyuswatan ti operasyon.
