LAOAG CITY – Kinumpirmaran ni Police Chief Inspector Joseph Baltazar, chief of police iti Paoay, Ilocos Norte ti panangiyuswat da ti search warrant operation ti balay ti dati a kameng ti Philippine Army.
Binigbig na daytoy a ni Jerry Cusilit, agtawen ti 44, dati a kameng ti armada, naasawaan ken residente iti Sitio Suyo, Barangay San Agustin iti nasao nga ili.
Segun ken ni Baltazar, nakaala da ti maysa a fragmentation grenade, maysa a calibre 38 revolver, 3 a bala para ti nasao a paltog, innem a pedaso a short magazine para ti M16 riffle, bandoliers ken maysa nga empty shell para ti caliber 60.
Inbatad ti opisyal nga ado dagiti maidandanun kadakuada a reklamo seknan ti masansan a panagprob-probokar ken panagpalto-paltog ti suspek iti lugar da.
Malaksid ti daytoy, masansan pay nga ireklamo ti pamilya na iti kwerpo ti pulisya gapu ti maipagarop a panangdangdangran na kadakakuada.
Iti agdama, nagtalinaed ni Cusilit iti kustodyar ti PNP iti ili a Paoay para ti naan-anay a pannakaimbestigar na.
Kabayatanna, kuna ni Baltazar a ti naudi a destino ni Cusili ket idiay Mindanao ngem saanna a masigurado no naikkat daytoy wenno nagretiro.
