LAOAG CITY – Agtultuloy ti imbestigasyon ti Philippine National Police (PNP) iti napasamak a panagtatakaw iti maysa a grocery store iti baro a tiendaan idiay Dingras, Ilocos Norte.
Nabigbig ti agtagikua ti grocery a ni Lilia delos Santos, agtawen iti 44, naasawaan ken residente iti Barangay Albano ti nasao nga ili.
Immuna ti daytoy, narekobre ni delos Santos a mapukpukaw dagiti uppat a karton iti grocery a naglaon iti powdered juice ken cheeze.
Naamoan a ti kada karton ket naglaon iti 144 a sachet ti powdered juice ken 16 a pedaso a cheeze, ken umab-abot iti 8,946 a ribo a pisos ti balor dagiti nasao a produkto.
Iti CCTV footage, makita ti maysa a babai nga in-inut a nangguyguyod kadagiti uppat a karton manipod iti nasao a pasdek negosyo ken adda met dagiti nagserbi a lookout na iti ruwar.
