LAOAG CITY – Kinumpirmaran ni incoming Barangay Chairman Ramon Lopez iti Barangay Elizabeth, Marcos, Ilocos Norte nga adda ti maysa a grupo nga agdawdawat ti 520 a pisos kadagiti kabarangayan na kas membership fee.
Inbatad na a basar ti nakasarsarita na a nagbayad ti nasao a gatad, ti palawag kadakuada ti nasao a grupo ket tinawen danto a maikkan ti sag-1 a milyon a pisos.
Kuna na a dagiti maibunong a kwarta ket maipagarop nga aggapo iti maibagbaga nga ill-gotten wealth dagiti Marcoses.
Segun ken ni Lopez, rumrumuar nga addan 50 a residente iti nasao a barangay a nakimiembro ti nasao a grupo.
Kabayatanna, inpakaammo ni Lopez nga adda ti nakaibaga kenkuana nga adda ti maangay a panagtataripnong dagiti maseknan intono miyerkules iti Barangay Cacafean ti met laeng nasao nga ili.
