LAOAG CITY – Agtultuloy a maag-agasan iti Mariano Marcos Memorial Hospital and Medical Center iti ciudad ti Batac ti maysa a lalaki a ni Mikee Agbuggo, residente iti Barangay Barani iti ciudad ti Batac, maysa kadagiti nairaman iti desgrasya iti Paoay-Balacad Road iti ili ti Paoay.
Daytoy ti inbatad ni Police Capt.Sygman Benigno, ti chief of police iti ili ti Paoay.
Inbatad ni Sygman nga adda metten iti natalged a kasasaad dagiti nakalugan iti tricycle nga isuda Joemar Tapec ken Aira Tapec, agpada a residente iti Barangay Callaguip iti ili ti Paoay.
Immuna iti daytoy, iti naiyuswat nga imbestigasyon ket naamoan nga agpapalaud ti motorsiklo idi napukawan ti kontrol rason nga immagaw iti linya ken nakadinnungpar na ti tricycle.
Gapu iti napasamak ket nagsagaba dagiti maseknan ti sugat iti nagduduma a paset ti ulo da ken naitaray da met a dagus iti ospital para iti pannakataming da.
Manamnama ti panagsasarita dagiti karaman iti desgrasya iti kabiitan a panwen.
