LAOAG CITY – Nagtalinaed nga awan ti puot ti maysa kadagiti biktima ti napasamak a desgrasya iti paset ti Barangay Salugan iti ili ti Currimao.
Nabigbig daytoy a ni Junel Garcia y aglipay, agtawen ti 23, awanan ti asawa ken residente iti Barangay Gaang iti nasao nga ili.
Basar iti imbestigasyon ti PNP-Currimao, bayat nga agpaabagatan a direksyon ti motorsiklo a nagluganan da Garcia ken ti inlubbon na a ni Melchor Reslin Jr y Sacro, agtawen ti 27, residente met laeng iti nasao a barangay idi ta saan na a maiturong ti driver ti uggor na a motorsiklo.
Gapo iti daytoy, naipurwak dagitoy iti maar-aramid a shoulder ti kalsada rason a nagsagaba dagiti biktima ti sugat iti nagduduma a paset ti bagi da kangrunaan iti muging ti driver.
Dagus a naitaray dagiti biktima iti ospital para iti pannakapaagas da.
Rumrumwar a dagiti biktima ket adda iti impluwensya ti nasanger ken maipagarop a napaspas ti panagpataray da rason a napasamak ti nasao nga insidente.
