LAOAG CITY – Pimmusay kabayatan a maag-agasan iti Mariano Marcos Memorial Hospital and Medical Center iti ciudad ti Batac ti maysa kadagiti dua a biktima iti napasamak a desgrasya iti national highway a paset ti Barangay 9, San Pedro iti ili ti Paoay .
Daytoy ti kinumpirmaran ni Police Chief Master Sergeant Christoper Tungpalan, imbestigador iti Philippine National Police iti ili ti Paoay.
Binigbig ni Tungpalan ti pimmusay a ni Cogie Acar, agtawen ti 19, baro, estudyante ken residente iti Batangay Bimmanga iti ili ti Currimao.
Inpakaammo ni Tungpalan a ti kadwa ni Cogie Acar a ni Sherman Acar, nangiturong ti motorsiklo ket agtultuloy a maob-obserbaran iti ospital gapu ta seryoso ti kasasaad na.
Immunan nga inbatad ni Tungpalan a dagiti biktima ket aggapo da iti ili ti Paoay ken agawid da koman iti ili ti Currimao idi napukawan ti kontrol iti manibela ti driver kalpasan a nagderderetso da iti kais-ispalto a paset ti kalsada.
Gapu iti daytoy ket nagbalbaliktad dagiti biktima a nangitunda ti panagsagaba da ti sugat iti nagduduma a paset ti bagida.
Rumrumuar a dagiti biktima ket nakainom da ti nasanger idi napasamak ti insidente.
