LAOAG CITY – Nagkiddaw ti pammakawan ti maysa kadagiti kababaknangan a templo idiay India gapu iti ipapatay ti innem nga indibidual ken dinosdosena ti nasugatan iti riribok kabayatan ti panagpilada nga ag-avail ti ticket iti pag-piyestaan.
Napasamak ti insidente idi napan a rabii kalpasan a rinibribu ti nagtitipon iti templo ti Tirupati iti makin-abagatan nga estado ti Andhra Pradesh.
Gapu iti daytoy, inpasigurado dagiti opisial iti estado a pagsungbaten da dagiti empleado ti templo, gapu ta isuda ti responsable iti napasamak a trahedia.
Mainiag iti daytoy, inyebkas met ni Andhra Pradesh Chief Minister N Chandrababu Naidu ti pannakipagladingitna iti pasamak ken simmarungkar iti templo idi laeng kalman.
Kinuna met ni Prime Minister Narendra Modi a maibilang ti insidente kas nakakaskas-ang a pasamak ken impasiguradona kadagiti naapektaran a pamilya ti naan-anay a tulong.
