LAOAG CITY – Natiliw ti maysa a mannalon iti paset ti Batac-Banna Road a sakupen ti Brgy. Naguirangan iti Siudad ti Batac.
Daytoy ket kalpasan iti balligi a pannakaisayangkat ti Buy-bust Operation a nagbibinnuligan dagiti kameng ti Philippine Drug Enforcement Agency, Philippine Drug Enforcement Unit, Intelligence Section, Intelligence Branch ti Ilocos Norte Police Provincial Office ken Batac City Police Station.
Binigbig ni Police Chief Master Sergeant Harold Nicolas, mangidadaulo iti PDEA ti suspek a ni Benjamin III Libed Maga alyas Jojo, agtawen ti 40, residente ti Brgy. Ricarte iti nasao a Siudad ken maysa daytoy a mannalon.
Inbatadna a nakumpiskar iti bulsa ti suspek ti siyam a plastic a sachet a maipagarup a naglaon ti maatap a shabu idinto a dua a plastic sachet a maipagarup a shabu ti nagatang iti suspek nga agbalor ti lima ribu a pisos babaen iti nagpammarang a pusher buyer.
Inpakaammona nga agdagsen ti 2.1 grams dagiti nakumpiskar a maipagarup a shabu nga agbalor ti sangapulo ket uppat a ribu a pisos.
Inlawlawagna a ni Maga ket maibilang kas High Value Target Individual iti Ilocos Norte Police Provincial Office ken karaman pay iti listaan iti Top 10 iti Regional Level.
Innayon ni Police Chief Master Sergeant Nicolas, ti naarestar a suspek ket karaman kadagiti nabatbati pay a miembro ti Rapisora Drug Group.
Kabayatanna, nagkedked metten a nangted iti aniaman a reaksion wenno komento ti nasao a suspek ken nagtalinaed daytoy iti pagbaludan ti PNP-Batac.
