LAOAG CITY – Kinumpirmaran ni Mayor Fidel Cimatu iti ili ti Bangui ken LMP Presidente ditoy Ilocos Norte a rumwaren ita nga aldaw manipud iti ospital ti maysa kadagiti nagpositibo ti covid-19 iti nasao nga ili.
Segun kenni Cimatu, maikabil ti nasao nga indibidwal iti isolation area iti ili da ken intono bigat ti maika-14 nga aldaw a pannaka-quarantine na.
Inlawlawag na a no malpas nan ti 14 nga aldaw a panag-quarantine ti indibidwal ket mabalinen a rumwar wenno agawid iti pagtaengan da.
Nupay kasta, kuna ti mayor a tapno makasigurado ket posible a manayunan pay ti dua agingga iti uppat nga aldaw ti panagtalinaed ti maseknan iti isolation area iti nasao nga ili.
Naamoan a basar iti DOH, kunana a dagiti nagpositibo iti virus ket mabalin latta a rumwar iti ospital uray awan pay ti 14 nga aldaw no laketdi negatibo ti resulta ti swab test dan.
Mainaig iti daytoy, manamnama met a mai-lift ti lockdown kadagiti purok a nakaipatungpalan daytoy.
