LAOAG CITY – Inburay ni Miss Jonna Mae Valite manipod iti ili ti Bacarra dagiti nagbalin a kapadasan na sakbay a nagbalin a naan-anay a public accountant.
Ni Valite ket nagturpos iti Mariano Marcos State University iti ciudad ti Batac ken maysa kadagiti nakapasa iti September 2023 Licensure Examination for Certified Public Accountant.
Inbatad na nga 44 da amin a nagturpos iti nasao nga unibersidad ken nangala iti eksaminasyon ngem 11 da laeng a nakapasa.
Inlawlawag na a sipud kinaubing na ket ti kurso nga Accountancy ti arapaap.
Nupay kasta, inadmitir na a gapu iti kinarigat dagiti eksaminasyon da ket adda ti gundaway a pinanunot na ti agbaliw ti kurso, ngem nagpannuray ti arapaap na nga agbalin nga accountant.
Kuna ni Valite a saan laeng a kinalaing iti math ti pagibasaran iti panangala iti kuro nga Accountancy no di ket masapol nga adda ti analytical skills ken makaawat ti grammar iti English.
Innayon na a ti maysa pay nga ibilang na a nagbalin a pannubok kabayatan ti panagadal na ket ti pinansyal.
Inpakaammo ni Valite a ti ina na ket maysa nga Overseas Filipino Worker iti Singapore idinto a ti ama na ket maysa a mannalon ken tricycle driver, ken maysa laeng ti kabsat na.
Mainaig iti daytoy, kuna na a ti nagbalin nga inspirasyon na tapno ipursige na a gun-oden ti arapaap na ket ti pamilya na gapu ta kayat na a lumag-an ti panagbiag da ken kalikagom na a makaawiden ti ina na tapno agtalinaeden iti Pilipinas gapu ta 16 a tawenen nga agtrabtrabaho idiay Singapore.
Inbalakad pay ni Valite kadagiti agar-arapaap a mangala iti kurso nga Accountancy nga iti baet a narigat ket masapol nga agtalek laeng iti kabaelan da ken saanda pulos a sumuko.
Kabayatanna, naragsak a nangipakaammo ni Valite a kalpasan a nakapasa ti Licensure Examination for Certified Public Accountant ket naawat a dagus iti maysa a kompanya iti Metro Manila no sadinno nga agpaay kas tax associate ken mangrugin iti trabaho na intono bigat, Oktubre 9.
Immunan nga inbatad ni Valite a ti immuna a nagdawatan na ti tulong tapno magun-od na ti arapaap na ket ti Diyos, ken kabulbulon metten ti suporta kenkuana ti pamilya na.
