LAOAG CITY – Naruay a tattao dagiti gimmatang kadagiti disinfectant, alchohol sanitizer ken dadduma pay iti maysa kadagiti supermarket iti Metro Manila gapu ti coronavirus disease.
Daytoy ti inpakaammo ni Mr. Roy Gazzingan, maysa nga ilokano ken mangmangged iti nasao a supermarket kalpasan a kinumpirmaran ti gobyerno national nga umaboten ti 24 a kaso ti covid-19 idi rabii.
Naamuan ti Bombo Radyo Laoag manipud kenni Gazzingan, malaksid kadagiti nasao a produkto, adu pay dagiti naggatang kadagiti nagduduma a makmakan gapu ti panagbuteng da iti nasao a virus.
Kuna na a gapu ti panaggatang dagiti tattao, maibibusen ti suplay dagiti nasao a produkto iti supermmarket agraman ti panangkurang ti suplay ti face mask.
Inpasingked ni Gazzingan a saan met a nagbaliw ti presyo dagitoy a produkto.
Naiget pay ti panangmonitor dagiti pada na nga empleyado iti supermarket kadagiti sumrek a tattao babaen ti panagusar da ti thermal scanner.
