LAOAG CITY – Maysa a maladaga ti naibelleng ti pagbasuraan iti Payao Elementary School idiay Barangay Payao iti ciudad ti Batac.
Daytoy ti kinumpirmaran a mismo ni PO1 Aristo Pagdilao iti PNP-Batac.
Segun ken ni Pagdilao, maysa a grade 5 student a taga Barangay Mabaleng ti nasao a ciudad ti nakakita ti maladaga ken dagus na nga inpakaammo ti mestro na.
Inreport met a dagus daytoy ti mangisursuro ti Barangay Nutrition Scholar (BNS) ti nasao a barangay.
Inbatad ni Pagdilao a ti nasao a maladaga ket maysa a lalaki ken kaipasngay idi mabelleng ti nasao a lugar.
Inpakaammo na a nangiyuswat a dagus ti survey dagiti maseknan no siasinno dagiti masikog ti barangay da a mabalin a nagpasngay ti maladaga ngem awan ti naduktalan da.
Gapu ti daytoy, kuna ni Pagdilao a possible nga aggapo ti sabali a lugar ti napan nangibelleng ti maladaga ti pagbasuraan ti Payao Elementary School.
Innayon na a naikabil a dagus ti maladaga ti Mariano Marcos Memorial Hospital and Medical Center idiay ciudad ti Batac para ti naan-anay a pannakataripato na.
