LAOAG CITY – Kinumpirmaran ni Police Inspector Daryll Galicia, deputy chief of police to PNP-San Nicolas a maysa a kameng ti PNP iti nasao nga ili ti nagpappaputok ti paltog.
Segun kenni Galicia, boluntaryo nga insuko ni PO2 Cember Tumbaga ken inadmitir na ti panagpaputok na ti paltog.
Immuna iti daytoy, ni Tumbaga ket napan naginom iti pwesto ti retirado a pulis a ni Lester Daoang iti Barangay 24 iti nasao met laeng nga ili.
Inlawlawag ni Galicia a bayat nga addan dagiti maseknan iti istasyon ti pulisya tapno pagsasaritaan ti saan a nabayadan ni Tumbaga iti naginoman da ket kellaat a nagtaray daytoy iti uneg ti van ket ditoy a nangrugi ti panagpappaputok na ti paltog.
Basar kenni Galicia, posible nga adda iti uneg ti bag ni Tumbaga ti paltog nga inusar na a nagpaputok gapo ta awan met ti nakita ta nga iggem na.
Kabayatanna, pagsasaritaan dan to pay laeng no anya ti sumaruno nga addang ni Daoang.
Agtultuloy met ti imbestigasyon ti PNP-San Nicolas mainaig ti nasao a pasamak.
