LAOAG CITY – Naglikudan ni Barangay Chairman Andres Guillermo Jr. iti Barangay Camanggaan ditoy ciudad ti Laoag ti alegasyon kontra kenkuana seknan ti maipagarop a saan na a kayat ti mangtratar ti kaso kadagiti kabarangayan na.
Segun kenni Guillermo, awan ti naawat na a reklamo seknan iti maipagarop a riri da Miss Josephine Marcos ken Ronilda Ulep idi Disyembre 27, itay napan a tawen.
Inlawlawag na a naamoan na laeng idi adda manen ti napasamak ken naireport pay iti pulis ngem naiyendorsar met laeng kenkuana.
Kalpasan a naawat na ti endorsement ti PNP ket dagus a nangipatulod ti summon kadagiti maseknan ngem maipagarop nga awan ni Ulep a mangawat uray nagsubli-subli ti maysa a barangay kagawad.
Inbatad na a basar kenni Ulep, rinaot isuna ni Marcos ken tinungpa na ngem gapo ta saan na a mapungot ket maipagarop a ti anak ni Ulep ti pinagipapasan na ken dinangran.
Nupay kasta, kuna ni Marcos a saan na a dinangran ti agtawen ti dua nga ubing no diket inpa-igid na tapno saan a mairaman gapo ta nagginnubal da.
Innayon ti kapitan a saan a rimmaot ni Marcos ken awan ti ammo na a dimmalan ti medical examination ken psychiatric ti ubing.
Naamoan a maiyuswat ti hearing intono Domingo, Enero 20.
