LAOAG CITY – Agtultuloy a maag-agasan ti maysa a lakay ken maysa a babai iti Laoag City General Hospital kalpasan a nadesgrasya da iti Bgry. Balacad ditoy siudad ti Laoag.
Immuna iti daytoy, nakita lattan ni Mr. Jugi Leaño ti lakay a ni Jose Bacting a nakabisekleta ken residente ti nasao a barangay a nakadasay iti tenga ti kalsada ken ti maysa a babai a ni Mia Kenet de Claro, residente ti Poblacion Uno iti ili a Currimao, ken nangimaneho ti maysa a motorsiklo.
Inpakaammo na a dagus a timmawag ti ambulansya iti ili ti Paoay.
Kuna na a nagsagaba ti lakay ti sugat iti akin kannawan a muging na gapu ti pannakadesgrasya na.
Inbatad ni Leaño a ti babai a nagmaneho ti motorsiklo ket nakita na a nakatugaw daytoy ken tamtamingen ti maysa a nurse a nagresponde.
Nupay kasta, saan a nakita ni Leaño ti pudno a napasamak iti desgrasya gapu ta nakita laengen a nakadasay ti lakay ken nakatugaw ti babai.
Iti agdama, agtultuloy ti imbestigasyon dagiti kameng ti PNP traffice division mainaig iti daytoy a desgrasya.
