LAOAG CITY – Inpakaammo ni Brgy. Chairman Lauro dela Cruz iti Brgy. 12 ditoy ciudad ti Laoag iti Philippine National Police (PNP) nga adda ti nakakita iti kabsat na nga ada iti sangwanan ti barangay hall iti Brgy. 13 nga awanan ti puut.
Nabigbig daytoy a ni Federico dela Cruz, agtawen ti 73, awanan ti asawa, kabsat ti kapitan ken residente iti nasao met laeng a barangay.
Immuna iti daytoy, nakita ti agnagan ti Jane Adena, addaan ti umno a tawen, naasawaan ken residente iti nasao a barangay 13 iti nasao a ciudad ti biktima nga adda iti sangwanan ti barangay hall.
Segun ti nakakita, adda ti sugat ti biktima iti agong, kannigid a tumeng ken ti muging na.
Gapo iti daytoy, nagpatulong daytoy kadagiti kabarangayan na ken naitaray ti biktima iti Gov. Roque Ablan Sr. Memorial Hospital ngem naideklara a dead on arrival.
Basar ti imbestigasyon dagiti otoridad, kalpasan ti occular inspection ket naitupa ti ulo ti biktima iti iking ti plant box iti sangwanan ti barangay hall iti Brgy. 13 gapo ti kinabartek.
Naamoan a ti kangrunaan a rason ti nakatayan ti biktima ket gapo ti head injury ken inpakaammo ti doktor a natay ni dela Cruz uppat nga oras sakbay a naitaray iti ospital.
