LAOAG CITY – Natay ti maysa a lolo kalpasan nga imminom iti uppat a botelya nga energy drink iti Barangay 25 ditoy ciudad ti Laoag.
Nabigbig ti biktima a ni Reynaldo Andres, agtawen ti 65, jeepney driver, ken residente met laeng iti nasao a lugar.
Naamoan a kalpasan nga ininom ni Andres ti uppat a botelya iti energy drink ket napan iti ili ti San Nicolas ken inparada na ti lugan na iti likud ti Robinson’s mall tapno maturog.
Nupay kasta, maipagarop a saanen a nakariing ket narekobre laengen ti bangkay na nga agruprupsa iti uneg ti lugan na.
Segun ken ni Doctor Lionel Obien, Municipal Health Officer iti ili ti San Nicolas, posible nga atake ti puso ti nakatayan ti biktima.
Inlawlawag ni Obien a ti panaginom iti ado nga energy drink ket dakes iti salun-at ken adda ti posibilidad na nga agresulta iti heart attack.
