LAOAG CITY – Patyen ni Mrs. Ma. Teresa Pascua ken dagiti residente ti Barangay Cabungaan-B South ditoy ciudad ti Laoag a pudno ti palawag ni Mr. Edwin Julian a linuganan ti espirito.
Segun kenni Pascua, basar ti palawag ni Julian, idi parbangon ti Sabado ket napan immisbo ken adda ti baket a nakamangisit nga atiddog ti buok na a nangayab kenkuana ken nagkinkinnamatan da.
Inlawlawag na nga idi nabannog ni Julian ket maipagarop a pinagbalin isuna nga aso ti baket, nagtugaw ken kinibkiban na ti natablon a kayo ti mangga ken arig na nagbalin a maysa nga aso.
Inbatad na a nakita na a mismo ti pasamak ken idi tenglen da kadwa na dagiti uppat pay a residente ket napigsa ni Julian.
Rumrumwar nga idi sinibugan da ti holy water ken kinararagan da ket kagura ni Edwin ken arig na kumagat wenno agbalin a narungsot.
Iti agdama ket adda pay laeng iti ospital ni Julian ken ti duktal dagiti doktor ket nag-highblood.
Kabayatanna, kinumpirmaran ni Pascua a saan unay a makasao a naimbag ni Julian, ti maibagbaga a naluganan ti espirito.
Malaksid iti daytoy, kuna nga idi ubing ni Julian ket adda pay ti epelipsy na ngem nalaingan met laeng.
Manaig iti daytoy, patyen na a ti espirito ti maipagarop a baket ket isu met laeng ti makitkita ti anak na iti daan a balay iti nasao a lugar.
Inpetteng na nga adda ti karkarna a mapaspasamak iti nasao a balay sipud pay laeng idi ubing da agingga ita a panawen.
Inlawlawag na nga idi ubbing da ket adda ti marikrina da, ken adda dagiti makitkita da a puraw a bao ken uleg.
