LAOAG CITY – Nasugatan ti akin-kannawan a saka ti maysa a lalaki gapo iti napasamak a panagririri iti paset ti Barangay 16, San Marcos iti ili ti San Nicolas.
Binigbig ni PO3 Jhan Lay Apostol, imbestigador iti PNP-San Nicolas ti biktima a ni Benny Tipagan, taga Cagayan, maysa a pahinante idinto a ti suspek ket ni Roel Ocarit, taga-Leyte.
Segun kenni Apostol, aggi-inom ti biktima ken suspek ken dagiti kakadwa da idi adda ti saan da a nagkikinnaawatan a rason ti napasamak.
Inlawlawag ni Apostol a basar ti imbestigasyon da ket maipagarop a napangasan ti suspek iti biktima a rason nga intudok na tinabuon a bote iti akin-kannawan a saka ni Tipagan.
Immuna iti daytoy, idi nalpas dagiti maseknan a naginom ket napan nagidda ti biktima ngem agtultuloy ti panagsinnungbat da iti suspek ket ditoy a kellaat a napan na dinarop ti biktima.
Kunana a basar iti biktima ket pagsaritaan dan to iti suspek ti pasamak iti barangay.
Iti agdama ket adda iti kustudiyar ti PNP-San Nicolas ti nasao a suspek.
