LAOAG CITY – Natay kalpasan a nabagbagkong ti maysa a lalaki iti ili ti Currimao.
Nabigbig ti biktima a ni Irineo Racpan, agtawen ti 51, addaan ti asawa ken residente ti Brgy Gaang ti nasao nga ili.
Nabigbig met ti suspek a ni Joemar Bugaoisan, agtawen ti 33, addaan ti asawa ken residente met laeng iti nasao a barangay.
Segun ti PNP Currimao, bayat ti panagpatrolya dagiti pulis ket adda ti nangpara kadakuada ken nabigbig a ni Nieda Racpan, agtawen ti 52 ket inbaga na nga ti asawa na ket nabagbagkong ti nagduduma a paset ti bagi na.
Dagus met a nagturong dagiti pulis iti lugar nga inbaga ti asawa ti biktima ket ditoy a nakita da a nakatugaw iti tugaw a kawayan nga adda iti uneg ti pagtaengan da.
Naammuan a sakbay a nakita ti biktima a natayen ket immuna a nagsarsarita da iti suspek agingga a naparnuay ti saanda a pinagkinnaawatan ket nagawid ni Bugaoisan.
Nupay kasta, bayat nga matmaturogen ti biktima ket ditoy a nagsubli ti suspek ket binagbagkong na ti biktima.
Naitaray ti biktima iti Mariano Marcos Memorial Hospital and Medical Center iti ciudad ti Batac ngem naideklara a dead on arrival.
Narekobre dagiti otoridad iti nakapasamakan ti insidente ti maysa nga immuko nga agatiddog ti 15 a pulgada.
Dagus a natiliw ti suspek kalpasan a naiwayat ti hot pursuit operation no sadino a naipadalan ti medical ken alcoholic breath examination nga nagpositibo.
