LAOAG CITY – Kinumpirmaran ni PO2 King John Sabado, imbestigador iti PNP-Batac ti napasamak a desgrasya a nakairamanan ti maysa a motorsiklo, Isuzu pickup ken kotse iti Barangay Cabug idiay ciudad ti Batac a nakatayan ti maysa a lalaki.
Iti eksklusibo nga interview ti Bombo Radyo ken ni Sabado, inlawlawag na nga agpada nga agpapa-amyanan a direksyon ti motorsiklo ken pickup iti national highway ti nasao a barangay.
Nupay kasta, kellaat a nag-U turn ti pickup nga inturong ni Dea Banayat, agtawen iti 18 ken taga Barangay 25, Payao ti nasao a ciudad a nagresulta ti pannakadungpar ti motorsiklo nga inturong ni Richelle Sadiri, agtawen iti 31 ken taga Barangay Caestebanan iti ili a Banna.
Gapu ti kapigsa ti pannakaidungpar ni Sadiri ket nagsagaba ti nakana a sugsugat kangrunaan ti ulo na.
Naitaray ni Sadiri iti Mariano Marcos Memorial Hospital and Medical Center iti ciudad ti Batac ngem naideklara a dead on arrival.
Kabayatanna, kinumpirmaran pay ni Sabado nga adda met ti maysa a kotse a naidungpar iti poon ti niyog kalpasan a liniklikan na ti napasamak a desgrasya.
Mainaig ti daytoy, rumrumuar nga adda ti natennag a water jag ti pickup isut gapun a nagU-turn ngem saan pay a makumpirmaran ti PNP-Batac.
