LAOAG CITY – Natiliw ti maysa a lalaki gapo ti panagikot na ti saan a lisensyado a paltog idiay Brgy. 22, San Cristobal iti ili ti Sarrat, Ilocos Norte.
Daytoy ti inbatad ni Police Chief Inspector Roldan Suitos, chief of police ti PNP-Sarrat.
Binigbig ni Suitos ti lalaki a ni Cristopher Paulino, maysa a barangay tanod ken residente iti nasao a lugar.
Segun kenni Suitos, nakaawat ti tawag dagiti kameng ti PNP-Sarrat manipud iti maysa a concerned citizen seknan ti nasao a banag.
Inlawlawag na nga apaman a nagresponde da ket nakita da ni Paulino nga addaan paltog ket ginandat pay ti suspek ti aglibas idi nakita na dagiti otoridad.
Inbatad na a saan a nakalibas gapo ta adda pay ti pulis a nakapwesto iti likod ti balay da a pagnaan na kuma nga aglibas.
Nakumspikar dagiti otoridad ti maysa nga sling bag a nangisit a nakaikabilan ti caliber 38 a paltog, lima a bala a naka-load ken maysa a bala a nakabulsa iti bag.
Innayon ni Sutios a kanayun a makitkita dagiti residente ti nasao a lalaki a nakaawit ti bag nga addaan ti paltog.
