LAOAG CITY – Balligi a natiliw dagiti otoridad ditoy ciudad ti Laoag ti lalaki kalpasan a nagtakaw ti bag nga adda iti uneg ti comparment ti motorsiklo iti paset ti Marcos Stadium.
Nabigbig daytoy a ni Rolly Reynon Acido, agtawen ti 33, naasawaan ken residente idiay Barangay 2 dito ciudad ti Laoag idinto a ti biktima ket da Mary Jane Opria, residente ti Barangay 8, San Nicolas ken ni Zeus Cheser Bumanglag, residente idiay Barangay 59-B, Raraburan ditoy ciudad.
Iti imbestigasyon ti PNP-Laoag, manarimaan ti panag-jogging dagti biktima idi nakita da ti suspek a mangal-ala ti bag ken dagus a naglibas a nakalugan ti motorsiklo.
Dagus a nagreport dagiti biktima ket natiliw ti suspek iti sangwanan ti pagpapaayan na a Cockhouse bar iti Barangay 8 ditoy ciudad.
Karaman kadagiti nakumpiskar iti suspek ti maysa a bag a naglaon ti cellphone, dua a t-shirt, wallet nga addaan ti 610 a pisos ken coin purse a naglaon ti 45 a pisos, sabali pay ti belt bag a naglaon ti cellphone ken nagduduma a dokumento.
Mainaig iti daytoy, inadmitir ti suspek nga inaramid na daytoy ken inpetteng na a nakalukat ti compartment ti motorsiklo ngem basar kadagiti biktima ket nakarikep ken napilit a nalukatan daytoy.
Iti agdama ket nagtalinaed ti suspek iti kustudiyar ti PNP-Laoag bayat a maisagsagana ti kaso a maipila kenkuana.
