LAOAG CITY – Natiliw ti maysa a lalaki kalpasan a naduktalan ti panangala na iti dua a botelya a bangbanglo ken maysa a pack a biscuit iti maysa a convenience store idiay Barangay 1, Bacarra, Ilocos Norte.
Nabigbig daytoy a ni Mike Dianalan, agtawen ti 26, baro ken residente iti Barangay Curucor ti nasao nga ili.
Inlawlawag ti guwardia a ni Roly Reyes a sinipsiputan na ti suspek ket ditoy a nakita na ti panangisabukel na ti dua a bangbanglo ken maysa a supot a biscuit.
Gapu ti daytoy, inreport a dagus ni Reyes iti PNP ti napasmak ken iti panagresponde dagiti otoridad ket ditoy a tiniliw da ti suspek.
Iti panangukag dagiti otoridad iti bag ti suspek ket nakakita da dagiti dua a bangbanglo, biscuit, 300 a pisos ken adda pay iti lima a sachet a naglaon iti maipagarop a shabu.
Manamnama a mapilaan ti suspek iti kaso a panagtakaw ken panagikot iti illegal a droga.
