LAOAG CITY – Kinumpirmaran ni Barangay Chairman Rogelio Garaño iti Barangay Dilavo, Pasuquin, Ilocos Norte nga adda ti maysa a mangisursuro a napan kinabkabil ti live-in partner na iti Dilavo Elementary School.
Inlawlawag na a basar kadagiti nagannak ken sumagmamano nga agad-adal ti nasao a pagadalan, napan kinabkabil ni Barangay Kagawad Louie Quides iti Barangay Caroan ti nasao nga ili ti mestra a live-in partner na a ni Maricel Aguinaldo.
Inbatad na a segun kadagiti ubbing, namindua a daras a dinanog ti barangay kagawad ti abaga ti live-in na a mangisursuro.
Gapu ti daytoy, kuna ti kapitan a kayaten dagiti nagannak a maiyakar iti sabali a pagadalan ni Aguinaldo gapu ta saan da a kayat a kastoy ti makitkita dagiti annak da.
Innayon na a saan laengen a daytoy ti umuna a daras nga adda ti kastoy a napasamak iti uneg ti pagadalan kangrunaan na iti klase ni Aguinaldo.
Kabayatanna, inpasingked ni Aguinaldo a saan a dinangran ti live-in partner na no di ket nagsangsangit laeng gapu ti pinagsasao kenkuana ni Quides.
Inlawlawag na a namonganay iti saan da a nagkinnaawatan iti barangay kagawad kalpasan ng a inbabaan na iti cellphone gapu ta mangrugin ti klase na.
Uray ni Barangay kagawad Quides ket naglikudan na ti alegasyon a dinangran na ti nasao a mangisursuro.
